தொலைந்துபோன தொன்மைகள்

விவசாயம்

 

விவசாயம் கற்பித்த பெண்ணை போற்றி

வளர்த்ததுதான் பழக்கம்

அடி மாட்டு கூலிக்கு களை புடுங்க

வைப்பதுதான் இப்போதைய புழக்கம்

 

அடுத்த போக விளைச்சலுக்கு விதை நெல்லு

சேமித்துதான் பழக்கம்

விதை நெல் விலை கொடுத்து

நெகிழிப்பையில் இப்போதைய புழக்கம்

 

சேமித்த விதை நெல் சோதனையெல்லாம்

அந்தக்கால ஆராய்ச்சி பழக்கம்

முளைப்பாரி தூக்கிப்போயி ஆற்றில்

கரைக்கிற ஊராச்சி இப்போதைய புழக்கம்

 

இயற்கை கழிவு உரத்தால விளைந்த எல்லாம்

மனிதனுக்கு உரமானது பழக்கம்

வேதியல் உரத்தால சீக்கிரமே மனிதன்

மண்ணுக்கு உரமாவது இப்போதைய புழக்கம்

 

வானிலைய கணக்கு பார்த்து ஆடி காற்றில்

விதைச்சிதான் பழக்கம்

ஆடி பதினைட்டுனு தள்ளுபடியில் பொருள்

சேர்ப்பதுதான் இப்போதைய புழக்கம்

 

தோட்டக்காரன் தூங்கும் நேரம் மாடு

மேய்ந்துதான் பழக்கம்

மேய்ந்த நிலத்த மாடு பார்க்க புதுமனை புகுவிழா

புகுவதுதான் இப்போதைய புழக்கம்.

 

இடி தாங்கும் கேழ்வரகு விளைச்சலுக்கு

கோபுரத்தில பழக்கம்

பன்னிரண்டாண்டுக்கொரு முறை குடமுழுக்காகிப்

போனதுதான் இப்போதைய புழக்கம்.

 

-சு.ரகுநாத்.