பேருந்து பயணத்தில்

என்ன சாதியோ; என்ன மதமோ;

அருகமர்ந்தவர் தோள்

அவ்வளவு சுகமான தலையணை

தாய் மடியின் சுகம்

தாய் மாமன் தோள்களில்.

என்ன சாதியோ; என்ன மதமோ;

வாங்கிவைத்த குழந்தை

பேய்ந்தது மடியில் மூத்திரம்

தாய்மாமன் மடியாக

நனைந்தது முழுவதும்.

என்ன சாதியோ; என்ன மதமோ;

படி விளிம்பில் தொற்றிய என்னை

அள்ளி அணைத்த கரங்கள்

உடன் பிறந்த அண்ணனின்

அக்கறை வரங்கள்

என்ன சாதியோ; என்ன மதமோ;

ஈர் இருக்கையில் தனித்திருக்க

அண்ணா என உரிமையோடு

எழுப்பிவிட்டு அமரும்

இரு தங்கைகள்.

ஏனிந்த சாதியோ; ஏனிந்த மதமோ;

பார்ப்போரெல்லாம்

சொந்தமாக இருக்கையில்.